Arabako Teknologia Parkearen eraikin nagusian egin da Moore4Medical Europako proiektuaren 6. lantegia. 68 erakundetako (tartean, Europar Batasuneko 13 herrialdetako enpresa pribatuak eta unibertsitateetako eta ikerketa zentroetako ikertaldeak) 80 parte hartzailek Philips multinazional herbeheretarraren (elektronikako eta sistema medikoetako eta zerbitzuen berrikuntzako atalak) lidergoa duen topaketa batean hartuko dute parte.

Gasteiz aukeratu dute ekitaldiaren egoitza izateko; izan ere, estrategikoki kokatuta dago, eta Universidad del País Vasco/Euskal Herriko Unibertsitatearen NanoBioCel taldearen oinarri hirietako bat da (‘drug adherence’aren aroko ikertalde garrantzitsu bat da hori).

Moore4Medical Europako proiektuak 3 urteko iraupena du eta azken txanpan sartu da. Horren barruan, NanoBiocel taldea produktu biofarmazeutikoaren liofilizazio prozesuan eta horiek gailu mikrofluidikoetan erabiltzean zentratu da.

Moore4Medical proiektua

UPV/EHUko NanoBiocel ikertaldea CIBER BBN eta Nanbiosis AZTBren parte da, U10 Drug Formulation atalaren bidez, eta Arabako Campuseko Farmazia Fakultateko irakasle Jose Luis Pedraz du buru. Europako Moore4Medical proiektuan parte hartzen ari da, gailu mikrofluidikoetan produktu biofarmazeutikoen liofilizazio prozesua optimizatzea xede duela. Proiektuaren helburu nagusia da indartzen ari diren hainbat espezialitate medikotarako gailu elektronikoetan eta mikrofabrikatuetan berrikuntza azkartzea.

Moore4Medical proiektuak, hiru urtekoak, ECSEL (Electronic Components and Systems for European Leadership) elkarte publiko-pribatuaren finantzaketa dauka. Elkarte horrek osagai eta sistema elektronikoen sektorea indartzeko ikerketa eta berrikuntza programa bat kudeatzen du, Europar Batasunak garapen teknologikoaren abangoardian jarraitu dezan. Proiektuaren finantzazio osoa 68 milioi eurokoa da, eta horietatik milioi erdia baino gehiago NanoBiocel lanari eman zaio.

Gailu mikrofluidikoa

UPV/EHUk, Arrasateko microLIQUID enpresarekin batera, botika liofilizatuak gailu mikrofluidiko batean integratzeko eta berhidratatzeko eta, hala, ondo administratzeko, teknologia garatzen lan egingo du. Botika liofilizatua gailu mikrofluidikoaren barruan sartuko da, teknika zehatz batzuk erabiliz fluidoaren eta botikaren artean interakzio egokia bermatzeko, eta ponparen bidez emango da. Azken helburua honako hau da: botikak bide parenteraletik emateko sistema bat diseinatzea, pazienteentzat askoz ere erosoagoa izatera eta tratamenduen betetze terapeutikoa hobetzera zuzendua.

microLIQUID enpresa bioteknologikoa teknologia mikrofluidikoen sektorean erreferentea da eta modulu mikrofluidikoak diseinatu eta garatzeaz arduratuko da.

‘Botiken atxikidura’ deituriko lan horretan –proiektu osoaren barruan dago–, NanoBioCel taldearekin batera honako kide hauek arituko dira lanean: Irlandako Tyndall institutu nazionala, AbbVie multinazional farmazeutikoa, Alemaniako Fraunhofer Institute, Philipseko zerbitzuen berrikuntzako atala, Alemaniako Gaudlitz GmbH enpresa, polimeroetan espezializatua, Alemaniako Karlsruhe Teknologia Institutua eta Madrilgo HI Iberia enpresa.