Deskribapena

2025. urtean zehar, Kimika Fakultateak bere 50 urteak ospatuko ditu, jarduera-programa zabal eta askotarikoarekin. Programa hori Donostia Kulturarekin zein Materialen Fisikako Zentroarekin batera antolatutako hitzaldi-zikloarekin hasi zen urtearen hasieran, ‘50 Urte Kimika Zabaltzen’ izenburupean. Ziklo honetan Kimika Fakultateko kideek Fakultatean garatzen diren hainbat gairen inguruan arituko dira Ernest Lluch kultur etxean, publiko orokorrari irekitako hitzaldietan. Hitzaldiak hilabetean behin gauzatuko dira, Materialen Fisikako Zentroko komunikazio arduradunak, Idoia Mugikak aurkeztuta. Hizlarien artean perfil desberdin anitzeko Fakultateko kideak daude, hala nola, Euskadi Ikerkuntza Sariak, proiekzio handiko gazteak eta zientzia zabalkuntzan adituak.

Produktu bioteknologikoak oso garrantzitsuak dira gizakion bizi iraupena eta bizi baldintzak hobetzeko. Produktu hauek garatzeko mikrobiologia eta biokimikaren konbinaketa beharrezkoa da askotan. Zikloaren laugarren hitzaldi honetan Ana Beloqui Ikerbasque ikertzailea (Polymat) eta Lide Arana Kimika Fakultateko irakasle ikertzailea txertoen eta antibiotikoen funtzionamenduari buruz arituko dira. Hitzaldia elebiduna izango da.

Sarrera irekia da eserleku guztiak bete arte.