Hain zuzen ere, UPV/EHUko bi ikaslek lehenengo saria jaso dute: Endika Legarra Nuin, Euskal Ikasketetan graduduna, eta Uxue Martín Silva, Kriminologian graduduna; bigarren saria hiru ikaslek: Asier González Casado, Euskal Ikasketetan graduduna; Gontzal Lezcano Castillo, Ingeniaritza Kimikoan graduduna, eta Leire González Yubero, Filologian graduduna; eta hirugarren saria bi ikaslek: Maria Elvira Bueno Miguel, Lan Harremanetan eta Giza Baliabideetan graduduna, eta Nerea Guinea Trapote, Energia Berriztagarrien Ingeniaritzan graduduna. 

Bost jakintza arloetatik, Ingeniaritza eta Arkitekturarena nabarmentzen da lehenik, 168 sarietatik 48 arlo horretan eman baitira. Hurren, eta oso gertu, Gizarte eta Lege Zientzien adarra dator, 45 sarirekin. Arteen eta Giza Zientzien adarra dator hirugarrenik, 36 sari jasota. Azkenik, Osasun Zientzien eta Zientzien arloak leudeke, 21 eta 18 sarirekin, hurrenez hurren. Guztira, 56 lehen sari banatu dira, 3.300na eurokoak; 56 bigarren sari, 2.650na eurokoak; eta 56 hirugarren, 2.200na eurokoak. Irabazleen espediente akademikoetan sariaren aipamena jasoko da.

Uxue Martín Silva (Pasaia, 1996)
Kriminologian graduatua
Lehen saria Gizarte eta Lege Zientzien adarrean

«Lehen sari bat emana zidatela jakin nuenean, shock egoeran geratu nintzen»

Horrela adierazten du Uxue Martín Silvak lehen saria irabazi zuela jakin zuenean sentitu zuena, itxaropen handirik gabe aurkeztu baitzen. Uxuek bazuen sari horien berri, eta patxadaz itxaron zuen berari zegokion graduazio urtearen deialdia iritsi arte. Ez zion ezer esan familiari, eta ia urtebeteren buruan, Kriminologiako ikasketengatik lehen saria lortu zuela jakinarazi ziotenean, bere poza harridura bezain handia izan zen. “Asko pozten nau gradua egiten eman nituen lau urteetan egindako ahaleginak eta sakrifizioak aitorpena izateak” dio Uxuek. Etorkizunean aurkeztuko direnei gomendio hau ematen die: “gutxieneko notaren baldintza betetzen baduzue, aurkeztu eta ea zortea duzuen, "ezezkoa" beti hor izango duzue”.

Uxue Martín Silva Euskal Herriko Unibertsitateko doktorego aurreko ikertzailea da gaur egun, gorroto delituen gaiaren inguruan. Hau da Uxueren doktorego tesiaren izenburua: “Gorroto delituagatik biktimizazioa gutxiengo etniko eta erlijiosoetan eta LGTBI komunitatean EAEn: hurbilpen enpirikoa inkesta bidezko ikerketa baten bidez”.

Endika Legarra Nuin (Iruña, 1996)
Euskal Ikasketetan graduatua
Lehen saria Artea eta Giza Zientzien adarrean

«Ikasle garaietan bizitutako esperientziekin geratzen naiz»

Endika Legarra Nuinek urte haietan bizitutako guztia nabarmentzen du: “nirekin eraman ditudan harremanak, eta, jakina, ibilbide horrek guztiak irakaskuntzan aritzeko eman didan aukera”. Nafarrak, sariaren berri izan zuenean nola sentitu zen ere kontatu digu; izan ere, baziren urte batzuk ikasketak amaitu zituela. “Nahiko harrituta geratu nintzen albistea iritsi zitzaidanean. Nolanahi ere, poz handia hartu nuen, baita nire ingurukoek ere”.

Endika Legarra Nuinek, behin gradua amaituta, Bigarren Hezkuntzako Masterra egin zuen Nafarroako Unibertsitate Publikoan, eta, ondoren, euskarako irakasle lanetan aritu zen Nafarroako hainbat institututan. Gaur egun Lizarrako ikastetxe batean dabil.

Asier Gónzalez Casado (Bilbo, 1982)
Euskal Ikasketetan graduatua
Bigarren saria Artea eta Giza Zientzien adarrean    

«Guztiontzat dago leku bat, eta nirea hizkuntzalaritzaren eta euskararen munduan dago»

Asier González Casadoren bizitzak 180 graduko bira eman zuen Euskal Ikasketetako Gradua egitea erabaki zuenean, Karrera amaierako bigarren saria irabaztera eraman baitu. Informatika ikasi ondoren, bere benetako bokazioa beste nonbait zegoela konturatu zen bilbotarra, eta bidea aldatu zuen. Bigarren gradua eta ingeleseko irakasle lana aldi berean egiten aritu zen eta oso urte gogorrak eta estresagarriak izan zirela aitortzen du, baina “hainbesteko ahaleginak merezi izan duela” ere adierazi du.

Bost urte haietako azkena, Gradu Amaierako Lanaren idazketari eskaini zion osorik - Orozkoko euskarari buruz- lanean jarraitzen zuen bitartean, eta Gradua egin ostean, Euskal Hizkuntzalaritzako Masterra egin zuen. Gaur egun, doktoregoko laugarren urtean dago eta euskararen deklinabidean atzizkiak sortzeari buruzko tesia amaitzen ari da. EGONLABUR mugikortasun beka ere eskuratu du eta, horri esker, egonaldi bat egin ahal izan du Tartuko Unibertsitatean (Estonia), non bizi den gaur egunean. Euskararen eta fino-ugriar hizkuntzen arteko paralelismoen inguruan lan egin du, bi hizkuntza familia horien izenen morfologiaren garapenean aurrera egin ahal izateko.

Asierrek oso positibotzat eta atsegingarritzat jotzen ditu urte akademiko horiek: “Ibilbide akademiko luze horietan, funtsezkoa da gure ahaleginek norabait garamatzatela ikustea”.

Gontzal Lezcano Castillo (Bilbo, 1996)
Ingeniaritza Kimikoan graduatua
Bigarren saria Ingeniaritza eta Arkitekturaren adarrean

«Sari hau, gertaera akademiko gogoangarri bat baino, are gehiago da hazkunde pertsonaleko prozesu bat»

Gontzal Lezcano Castilloren urterik garrantzitsuenak markatu zituzten ikasketei eskainitako orduek, proiektuetan lanean emandako gauek eta ikaskideekin eta irakasleekin elkarlanean gainditutako erronkek: “Gogoan dut zer emozio sentitu zuten nire familiak eta adiskideek albistearen berri izan zutenean; oso sentimendu biziak partekatu genituen egun hartan eta egindako ahalegin guztiarengatik biziki eskertuta eta harro sentiarazi ninduten”.

Etapa horretan egindako lorpenek ustekabeko ateak ireki zituzten Gontzalen ibilbide akademikoan. “Masterraren hasieran, irakasleetako batek Saudi Arabian doktoregoa egiteko aukera proposatu zidan”. Gontzalek gogo biziz onartu zuen eta hori inflexio puntu bat izan zen bere bizitzan; horri esker, aukerak konfort zonatik haratago bilatzen ikasi zuen.

Horrela, kimika ingeniari bilbotarra Ingeniaritza Kimikoan doktoratu zen (2020-2024) King Abdullah University of Science and Technology unibertsitate ospetsuan (KAUST).  Gaur egun doktoratu osteko ikertzaile gisa ari da lanean KAUSTen, (Arabia Saudi),  energia berriztagarrietara eta ekonomia zirkularrera bideratutako proiektuetan laguntzen eta berak duen esperientzia aplikatzen egungo erronka energetikoei modu berritzaile eta jasangarrian aurre egiteko.

Leire González Yubero (Gasteiz, 1996)
Filologian graduatua
Bigarren saria Artea eta Giza Zientzien adarrean

«Maitasun handiz gogoratzen dut Gasteizko Letren Fakultatea»

Leire González Yubero 2018an graduatu zen. Ondoren, EU Politics masterra —Europar Batasuneko politikei buruzkoa— egin zuen London School of Economics unibertsitatean. Harrezkero, Bruselan bizi da eta Europako Batzordean egiten du lan.

UPV/EHUn eman zuen garaitik, lanean oso baliagarriak izan zaizkion ikaskuntza asko jaso ditu, “batez ere briefing-ak, diskurtsoak eta abar idazterakoan” adierazi du gaizteiztarrak. Ikasle garaietatik Letren Fakultateko irakasleen laguntza nabarmentzen du eta estimu handitan ditu.

Nerea Guinea Trapote (Gasteiz, 1996)
Energia Berriztagarrien Ingeniaritzan graduatua
Hirugarren saria Ingeniaritza eta Arkitekturaren adarrean

«Energia eolikoa sustatzen zuen Zeelanda Berriko dokumental bat ikusi nuen eta hala jakin nuen egunen batean han biziko nintzela»

 Helburu hori lortu nahi izateak eraman zuen Nerea Energia Berriztagarrien Ingeniaritzako Graduan matrikulatzera. Gipuzkoako Ingeniaritza Fakultatearen Eibarko egoitzan, “nire bizitzako oroitzapen onenetako batzuk sortu nituen” azaldu du. “Ikaskideak eta irakasleak nire bigarren familia bihurtu ziren”. Gogotsu kontatzen du nola egiten zituzten otorduak eta nola bizi ziren denak elkarrekin, nola laguntzen zioten elkarri azterketaren bat gainditzeko edo nola ematen zizkieten eskolak beheragoko mailetako ikasleei: berdin-berdin arduratzen ziren birziklatzeaz, zein aisialdiko bidaia bat antolatzeaz, Tolosako inauteriak ikusteko, esate baterako.

Irakasleekin zuen harreman bikainari esker aurkeztu zen sari horietara. “Isabel, JI, Ángel, Eneritz... dira beti nirekin izango ditudan izenetako batzuk. Haiei zor diet sari hau”.

Gaur egun, bidaiatzeko grina eta Energia Klusterrean egindako ibilbidea bateratzen ditu, energia eolikoaren, hidrogenoaren eta olatuen energiaren arloetan proiektuetako ingeniari gisa lan eginez.

María Elvira Bueno Miguel (Bilbo, 1970)
Lan Harreman eta Giza Baliabideetan graduatua
Hirugarren saria Gizarte eta Lege Zientzien adarrean

«Ahalegin handia eskatu dit lana, bizitza pertsonala eta unibertsitateko ikasketak uztartzeak»

Elvirak 43 urterekin hasi zituen graduko ikasketak. Bi seme-alabaren ama izanik, ez zitzaion erraza gertatu lan bizitzaren eta bizitza pertsonalaren alderdi guztiak uztartzea; alabaina, administraria zen Ezkerraldea-Enkarterri-Gurutzeta ESIko Pertsonal Sailean, eta bere lanak karrerarekiko interesa piztu zion. "Graduak iraun zuen lau urteetan, goizez lanera joaten nintzen, eta arratsaldez, klaseetara" —azaldu du. "Sari hau ahalegin horren beste aitorpen bat izan da niretzat".

Elvirak gradua amaitu zuenean, gora egin zuen lanean. Gaur egun, Barakaldo bizi da  eta Ezkerraldea-Enkarterri-Gurutzetako ESIko Pertsonal Saileko zerbitzuburua da.