Deskribapena

Astelehenean, apirilaren 7an, 11:00etan, Gipuzkoako Foru Aldundiko prentsa-aretoan, Donostian, Euskal Herriko Unibertsitateko Informatika Fakultateak eta PUNTUEUSek antolatzen duten Gladys Sariaren V. edizioa aurkeztuko da prentsaurrean. Aurtengo deialdia babes sare sendoak lagunduta aurkeztuko da: Gipuzkoako Foru Aldundia da babesle nagusia, eta proiektuaren inguruan elkartu dira Emakunde, Danobatgroup, Euskaltel Fundazioa, EITB eta UPV/EHUko berdintasun zuzendaritza. Saria gero eta oihartzun handiagoa hartzen ari da, eta horren isla dira urtez urte partehartzea izaten ari den gorakada ez ezik, elkarlanean ari diren erakundeen konpromisoa.

Gladys Sariak ingurune digitalean ari diren emakume gazte euskaldunak saritu, gazteentzat erreferenteak sortu eta egiten duten lana jendarteratzea du helburu. Aurreko edizioetako sarituak izan dira: Ane Iturtzaeta, Olatz Perez de Viñaspre, Amaia Abanda eta Lorea Argarate. Info +

Prentsaurrekoan parte hartuko dute:

• Nerea Isasi, Gipuzkoako Foru Aldundiko berdintasun zuzendaria
• Miren Elgarresta, Emakundeko zuzendaria
• Olatz Arbelaitz, UPV/EHUko Informatikako Fakultateko berdintasun batzordeko kidea
• Lorea Arakistain, PUNTUEUS Fundazioko marketin eta komunikazio zuzendaria
• Iker Usabiaga, Danobatgroupeko Gestio Sozialeko zuzendaria
• Nerea Enbeita, Euskaltel Fundazioko zuzendaria