Bileren ostean Legebiltzarrean egindako agerraldian eskertuta agertu da EHUko errektorea eta “bilerak emankorrak” izan direla adierazi du errektoreak. Hala, talde parlamentarioekin hitzartuta zuten bilera-erronda amaitu dute gaur berak eta Bizkaiko errektoreordeak. Euskal Herriko Unibertsitateak dituen epe laburreko urgentzien eta epe ertain luzera begirako erronken berri emateko baliatu dituzte bilerak, eta horietarako finantzazio egokia beharrezkoa dela adierazteko. Ildo horretan, adierazi du errektoreak “sintonia ona egon da talde parlamentarioekin; bai gobernua sustengatzen duten taldeekin, bai oposizioko taldeekin ere”. Aurreko egunean bezala, gaur ere, “kezka adierazi digute taldeek segurtasunaren ikuspegitik premiazkoak diren lanak batzen dituen txostena helarazi diegunean”. Izan ere, “lehentasunezkoa da obra horiei aurre egitea eta martxoan, Zientzia, Unibertsitateak eta Berrikuntza saileko taldeari helarazi genion txosten horixe bera”, zehaztu du Bengoetxeak.

Era berean, eta komunitatearen segurtasunarekin eta ongizatearekin lotutako urgentziazko eskuhartzeetatik harago, berretsi du 2026ko aurrekontuek unibertsitatearen eguneroko beharrei eta etorkizuneko erronka eta proiektu estrategikoei erantzun behar dietela. Eta baieztatu du, 2026ko aurrekontuen negoziazioetan EHUk esku artean dituen erronkei behar bezala erantzuteko finantzazioa berma dezaten lan egiteko konpromisoa adierazi dutela talde guztiek.

Norabide horretan, gizartearen premia eta erronkekin lerrotuta, unibertsitate hobe bat eraikitzeko bidelagun izan daitezen eta proposamenak egin ditzaten eskatu die taldeei, Eusko Jaurlaritzaren proiektuei lotutako kontratu programetatik harago ere.

Legebiltzarreko Zientzia, Unibertsitateak eta Berrikuntza batzordearen egin beharreko agerraldiaren atariko izan da bilera erronda hau. Aurretik, baina, errektoreak jakinarazi duenez, Imanol Pradales lehendakariarekin batzartuko da maiatzean.