JAKIUNDE-Zientzia, Arte eta Letren Akademiak udaberriko Bilkura egin du Euskal Herriko Unibertsitateko Letren Fakultatean, Gasteizen. Ana Zubiaga Jakiundeko lehendakari berria, Juan Ignacio Perez Eusko Jaurlaritzako Zientzia, Unibertsitateak eta Berrikuntzako sailburu eta Jakiundeko kidea, eta Joxerramon Bengoetxea UPV/EHUko errektorea Bilkuran izan dira.

Batzarra duela hilabete batzuk Arantzazun (Gipuzkoa) egindako Bilkuran aukeratutako Akademiako bederatzi kideen kargu hartzearekin hasi da. Kide berrien artean, lau Euskal Herriko Unibertsitatekoak dira: Eneko Agirre Bengoa, Lengoaia eta Sistema Informatikoen katedraduna eta HiTZ taldearen zuzendaria, eta Mari Jose Olaziregi, Euskal Literatura katedraduna, biak ere kide hautetsi gisa; baita Xabier Barandiaran, filosofoa, irakaslea eta IAS-Research Centre for Life, Mind and Society taldeko ikertzailea eta Bárbara Jiménez Pazos, filosofoa, irakaslea eta ikertzailea iHPS-Integrated History and Philosophy of Science taldean ere, biak ere kide urgazle gisa.

Kide  berrien kargu hartze ekitaldiaren ondoren, Agustin Azkarate UPV/EHUko Arkeologiako katedradun emerituak, honako hitzaldia eskainiko du: ‘Arkeologia, iraganaren eta orainaren arteko “bitartekotza” praktika gisa. Gogoeta batzuk, egungo egoeraren harira’.